Bózio contra las ourbanidades

Dízen eilhes: "Nun teneis cinema". Cinema dízen eilhes, peç-me que nun coinceis a Charrau. Nó, nun tenemos semáfaros, filas de carros, que passar meia hora pa stacionar (anclui-se delantre de casa cumo an qualquiera sítio), nun tenemos aire poluído.
"Nien centros comerciales"?
Nó nien la cunfuson de ls centros comerciales, chenos de aire a cheirar a gasolina ne ls parques de stacionamiento, cun música pa adolecentes cun porblemas adonde se compra roupa.



"Bá, nun teneis nada."
Nien arribas, nien natureza, nien perdutos apanhados de la huorta atrás de casa, nien outros quemidos tradecionales, nien casas (bós le chamareis bibendas) adonde se puoda dar trés passos, nien coincemos ls bezinos, nien tenemos tradiçones, nien tenemos ua léngua. Nien tenemos alma.

Sodes mui abançados, homes mui ceblizados, mas nien sabeis l que ye i qual ye la palabra mais potente de l mundo. Esso nun son homes.